DURANGOKO AZOKAN
Abenduaren 6rako ekimena antolatu du Independentistak Sareak, jaiegun "arrotzen" aurka
"Gure herriaren gehiengoaren borondatearen aurka inposatutako" Konstituzio espainolaren egunerako, Ordu Berdea deritzon ekimena antolatu dute.
25/11/2011 11:42:00
BILBO-. Independentistak Sareak datorren abenduaren 6rako, "gure herriari inposatzen zaigun jaiegun espainiar" batean, ekimena antolatu du Durangon.
"Inposaketa honen aurrean berriro ere argi berdea independentziari aldarrikatuz" erantzuteko deia egin du aipatu herri ekimenak, eta egun horretan Liburu eta Diska Azokan murgilduta egongo den Durango herrira berdez jantzita joateko gonbitea egin.
Era horretan, herritarrak eguerdiko 12.30etan hasita eta 13.30etara bitartean burutuko den Ordu Berdean parte hartzera gonbidatu dituzte. Azaldu dutenez, kultura, musika, literatura, sukaldaritza eta bestelako alorrei loturiko lagunen ekarpena izango ditu ekimenak.
"Gure kultura eta hizkuntzarentzat hain garrantzitsuak diren egun hauetan, Euskal Herrian ditugun sormen eremu guztiak independentziaren aldeko borrokan inplikatzera deitzen ditugu", azaldu dute, eta jarraian gaineratu indenpendentzia dela "gure herriaren kultura eta identitatearen garapen aske, ireki eta anitzerako aukerarik onena, inongo inposaketa, kolonizazio, menpekotasun edo pertsekuziorik gabe".
Sareak ohar baten bidez aldarrikatu duenez, "estatu independiente baten sorrerak soilik eskainiko dizkio euskal gizarteari bere kultura, identitatea eta ezaugarri propioak mantendu eta garatzeko tresnak".
No hay comentarios:
Publicar un comentario